Suspek iti pammagkong idiay Caoayan, ikoten dagiti pulis

VIGAN CITY – Addan iti kustodiya ti Caoayan Municipal police Station dagiti uppat a suspek iti napasamak a pammagkong idi October 27 iti agdama a tawen.

Segun ken ni Police Captain Henry Garcia, hepe ti Caoayan municipal police station, kaso a murder iti maipila kontra kadagiti suspek a nangpapatay ken ni Nicolas Ragasa, agtawen uppat apulo ket maysa, baro, mangngalap ken agnaed idiay Fuerte, Caoayan.

Kinuna ni Garcia, adda ti kakaisuna a testigo iti napasamak a pammagkong ket takderan na ti testimonya na a mangitaltalmeg kadagiti suspek a da Mario Refuerzo Jr, agtawen dua pulo ket lima, baro; Errol Siztoza nga agtawen ti dua pulo ket siyam, naasawaan ken maysa a laborer; Reyner Fontanilla, agtawen tallo pulo, naasawaan kenni Jayward Fontanilla, agtawen dua pulo ket lima nga agpapada nga agnaed idiay Brgy. Pandan, Caoayan, nu pay ilibak da iti inaramid da a krimen.

Kabayatanna, desidido met iti pamilya ti biktima a mangidarum kadagiti suspek tapnu magun-od da iti hustisya para iti pannakatay ti maysa kadagiti kameng ti pamilya da.