Inlawlawag ti Vigan City Police Station a mapapati a cellphone iti inyawat ti maysa a lalaki iti suspek iti pammagkong idiay V. Delos Reyes Street, Vigan City, Ilocos Sur idi Domingo, March 8, 2026.
Dayta ket kalpasan nga adu a netizen iti nangbabalaw ken mangibagbaga a dayta a lalaki iti nangiyawat iti kutsilyo nga isu iti naaramat iti krimen.
Iti pannaki-uman ti Bombo Radyo Vigan ken ni PLt. Amado Somera iti Vigan City Police Station, iti panagkolektada iti CCTV footage iti agduduma nga anggulo iti nasao a lugar ket mapapati a maysa nga square a banag iti naiyawat wenno cellphone ngem ikagumaan iti kapulisan nga amwen iti kinapudno babaen iti panang-enhance iti video a naalada.
Segun ken ni Somera, uray ti suspek ket pinasingkedanna a sakbay iti pasamak ket maysa a kaduana a driver ti tricycle iti nangiyawat ti cellphone kenkuana ta nabatina dayta idi rabii iti Sabado iti lugar a nagi-inomanda.
Maipalagip a sakbay iti panangbagkong iti namin-ano a daras ti suspek iti biktima a kapadana a tricycle driver ket maysa a lalaki iti makita iti CCTV footage iti immasideg a mapapati a nangiyawat iti gamit nga impagarup iti kaaddoan ket isu ti kutsilyo a naaramat iti krimen.
Kabayatanna, napilaanen ti kaso a murder ti suspek ta immunan a pinasingkedan ti pamilia ti biktima a desidisoda a mangipila ti kaso kontra kenkuana.
