VIGAN CITY – Naipan idiay Provincial Jail ni Roberto Torres Gapusan nga agtawen ti uppat a pulo ket walo, naasawaan, seaman ken agnaed idiay Sitio Darurog, Barangay Maynganay Norte, Sta. Maria a nakemmeg idi alas dyes singkuwenta y singko iti agsapa idi kalman, November 13 gapu ti dua a bilang iti kaso a murder a sangsanguwen na.
Ni Gapusan iti maitudtudo a suspek iti pannakapapatay dagiti agkabsat a da John Glenn kenni Johanes Paul Taguibao idi August 16 idiay Barangay Maynganay Norte, Sta. Maria.
Ti warrant of arrest ti suspek ket inparuwar ni Judge Elizabeth Bringas ti Regional Trial Court, Branch 72, Narvacan a napetsaan idi October 28 iti agdama a tawen.
Naibilang a Top 10 Most wanted person ti provincial level ti suspek agsipud ta saan a simmuko idi napasamak iti krimen.
Maipalagip a napan naki-birthday iti ayan ti suspek ni John Glenn ta inawis da ngem saan a nagawid isu a sinapul ti kabsat na a ni Johanes Paul agingga a mapapati a nakita na iti panangpatay ti suspek ken dagiti kakadua na ti kabsat na isu a nagtaray.
Idi nagtaray ni Johanes Paul, adda ti maysa kadagiti kadua ti suspek a nakakita kenkuana isu a kinamat da ket mapapati a pinaltugan da a poon iti nakatayan na.
