VIGAN CITY – Desidido ti pamilya ti biktima iti attempted rape idi parbangon idi kalman ditoy syudad ti Vigan nga agipila iti kaso kontra ti kaarruba da nga agtawen ti dua pulo ket uppat nga immuli iti ayan na a matmaturog ken nanggammat iti barukong na ngem naka-ikkis isu a nakariing dagiti kabbalay na ket nagdar-daras a timpuak iti tawa ti suspek nga isu iti nakaluspiguan ti saka na.
Saan a ninamnama ti biktima a maaaramid kenkuana ti suspek iti nasao a banag agsipud ta agam-ammo da ngem saan da laeng unay nga agpatpatang ken saan met a nangipakpakita iti motibo kenkuana.
Kabayatanna, agsakit ti nakem ti lolo ti biktima iti napasamak agsipud ta nalaing da kadagiti karruba da, nangruna iti pamilya ti suspek ta papautangan na pay iti kwarta ti ina ti suspek ken agpipinnadigo da pay iti masida.
Maidalan iti drug test ti suspek ta atapen dagiti otoridad a nagaramat iti maiparit nga agas idi inuli na iti kwarto ti biktima ken ginandat na a ramesen.
Agsipud iti dayta, kalikaguman unay ti lolo ti biktima a maituloy iti kaso kontra ti suspek tapnu saan nan nga aramiden iti sabali ti inaramid na ti apo na.
Naduktalan a ginuyod ti suspek iti tricycle iti karruba da nga isu iti nagtalay-tayan na nga immuli iti kwarto a matmaturugan ti biktima.
