Nangisayangkat ti Land Transportation Office – Ilocos Region (LTO-RO1) ti random drug testing kadagiti driver ken konduktor ti pampubliko a luglugan idiay Vigan City Terminal kas paset ti programa ti Department of Transportation (DOTr) a “DOTr-LTO Biyaheng Ayos, Undas 2025”.
Naiwayat ti nasao nga aktibidad babaen ti pannakikammayet ti nasao nga ahensia kadagiti nadumaduma nga ahensia ti gobierno kas ti Philippine National Police – Highway Patrol Group (PNP-HPG), Philippine Drug Enforcement Agency – Ilocos Region (PDEA-RO1), ken Department of Health (DOH).
Iti pannaki-uman ti Bombo Radyo Vigan ken ni Assistant Director Engr. Eric Suriben ti LTO-RO1, gagem ti operasion a siguradoen a dagiti driver ken konduktor ket adda ti natimbeng a kapanunotan bayat ti panagbiyaheda.
Impaganetget ni Engr. Suriben a nasken nga idalyasat dagiti driver ken konduktor dagiti pasaheroda a naannad ken makadanon a nasaayaat ti papananda.
Kinuna pay ti opisyal a ti naiwayat nga operasionda ket ‘surprise random drug testing’ tapno makaalada ti naan-anay a respondents a makipaset ti aktibidadda.
Pinasingkedan ni Regional Director ti PDEA – Ilocos Region Atty. Benjamin Gaspi a ti random drug testing ket regular nga isaysayangkat ti opisinada kada Undas kadua dagiti naduma-duma nga autoridad tapno mapagtalinaed ti kinaurnos ti kalsada, wenno dagiti driver ken konduktor ken nasayaat ti kapanunotanda bayat ti idadalyasatda, ken dumanon kadagiti destinasionda a naannayas ken nadalimanek. Augie Arellano
