Nagpanawagan manen ni Sen. Sherwin Gatchalian iti agtultuloy a panangsuportar kadagiti mangisursuro iti baet ti implementasyon dagiti reporma iti basic education ita a tawen.
Maipatungpal ita School Year 2025-2026 ti strengthened Senior High School program kadagiti walogasut a pilot schools malaksid iti rollout ti MATATAG curriculum iti Grade 2,3,5 ken 8 ita a tawen.
Inlawlawag ti chairman ti Senate Committee on Basic Education a kadagiti mangisursuro iti dalan para iti balligi dagiti reporma a kayat nga ipatungpal ti sistema iti edukasyon isu a kasapulan a suportaran ida tapno masigurado nga epektiboda ti akemda a siguradoen a makasursuro dagiti agtutubo.
Impaganetget ni Gatchalian iti kinapateg ti training dagiti mangisursuro ken panangsigurado nga available ti dekalidad a learning ken teaching materials.
Napateg pay a makissayan ti workload dagiti mangisursuro ken i-streamline ti workflow babaen ti digital technology.
Malaksid dayta ket rumbeng a mapadaras ti hiring ti non-teaching staff a mangtutok iti administrative tasks.
