VIGAN CITY – Maragsakan ni LGBT Pilipinas Sec. Gen. Dindi Tan iti panangbigbig ti Simbaan a Katoliko kadagiti padana a kameng ti LGBTQ gapu ta insingasingen ni Pope Francis ti civil union kadagiti kameng ti LGBTQ+ community agsipud ta isuda ket annak met la ti Dios.
Iti pannaki-uman ti Bombo Radyo Vigan ken ni Tan, ti panangsuporta ti Santo Papa iti nabayagen a kalikagum ti adu a miembro ti LGBTQ saan laeng a ditoy pagilian no di ket iti intero a lubong ket dakkel a banag tapno mapapigsa ti moralda.
Patien ni Tan a babaen ti same sex civil union ket mabigbig ti karbengan dagiti LGBTQ ken maikkanda ti gundaway a mangiparikna iti ayatda ket saanda a mailaksid iti kagimungan ta adda karbenganda met laeng nga agpamilia.
Impaganetgetna a saan a rumbeng nga ibaba ti sabali a tao gapu laeng ta isuda ken naidumduma ken nagbalakad kadagiti padana nga itultuloy dagiti narugianda nga adbokasiya agsipud ta dakkel ti akemda iti pagilian.
