Impasigurado ni Presidente Ferdinand Marcos Jr. a saan laeng a dagus nga ayuda ti ited ti gobierno ngem uray pay ti suporta iti mental health dagiti estudyante a naapektaran ti napigsa a ginggined iti sumagmamano a paset ti Mindanao, pakairamanan ti Sarangani ken General Santos City.
Pinasingkedan ti presidente ti kinapateg ti panangrisut iti emotional ken psychological nga epekto ti kalamidad kadagiti agad-adal, kangrunaan kadagiti ubbing nga agul-ulimek ngem makapadpadas ti trauma gapu ti ginggined.
Adda programa ti Department of Health tapno matulongan dagiti estudyante a mabaelan da dagiti mapadpadasan da ken maikkat da ti emosional nga epekto ti didigra.
Inallukoy ni presidente Marcos dagiti mangisursuro ken opisial ti pagadalan nga ingetan da ti panangbantay kadagiti estudyante a mangipakita iti pagilasinan ti emosional a kasasaad.
