Agtaltalinaed nga awan ti suplay iti kuryente idiay Guam kagiddan ti panagduprak ti Super Typhoon Bavi.
Iti pannaki-uman ti Bombo Radyo Vigan ken ni Remy Benitez nga adda idiay Yigo, Guam, adda dagiti babassit a damage a nairekord iti nasao a pagilian isu nga awananda pay laeng iti suplay ti kuryente a gappuanan ti panagusarda iti generator.
Segun ken ni Benitez, saanda unay nga apektado iti bagyo ta pasaray naangin ken mapattu-pattuk a tudo laeng iti napasaranda.
Kinunana a gapu ti bagyo ket awan ti serrek iti trabaho dagiti ahensya malaksid laeng kadagiti maseknan nga ahensya nga agresponde kagiddan ti bagyo.
Nakasagana met iti maipaay a tulong para kadagiti maapektaran iti bagyo nangruna kadagiti agbakwit nga umili nga apektado.
Kabayatanna, awan iti nairekord a casualty ta saan a timmama iti bagyo iti mismo nga isla.
