Nasuspenso ti klase iti Rancho National High School iti ili ti Santa, Ilocos Sur gapu kadagiti mapatta-patta a sangapulo ket lima nga agad-adal a mapapati a naluganan iti dakes nga espiritu a ti dadduma pay kadakuada ket naawanan iti puot.
Segun iti maysa kadagiti naluganan a ni Yasmine Araña, naaddaan laengen iti puot idi adda isunan iti simbaan ken nabambannug ti riknana.
Innayonna nga adda nangisit ngem awan rupana a nangiyarasaas kenkuana a sapulenna dagiti kaduana ken saanda a dadaelen iti paggigyananda ta biag ti kasukatna.
Simgar ti riknana iti dayta a gundaway ken uray idi makitana dagiti ubbing a malugluganan met laeng.
Impaganetget met ni Barangay Captain Reynante Formoso nga isolated case laeng ti napasamak isu a nasken a saan a pagbutngan no di ket solusyonan tapno maisubli met laeng ti kinatalinaay ti pagadalan.
Balakad ti opisial kadagiti nagannak ken agad-adal a saanda nga imula iti panunotda a kasta ti mapaspasamak iti pagadalan ta maapektaran met iti panagadal dagiti ubbing.
Nupay kasta, impasiguradona nga agtultuloy ti panagtitinnulongda tapno maikkaten ti kasta a pasamak iti nasao a pagadalan.
