VIGAN CITY – Inbutaktak ni Probinsiyano Ako Partylist Rep. Jose “Bonito” Singson a sumagmamano kadagiti naipatugaw a board member ti Philippine Charity Sweepstakes Office (PCSO) iti karaman iti kurapsyon iti ahensya isu nga isuda laeng kuma iti masapul a madusa.
Segun ken ni Singson, adda dagiti board member nga agar-aramid iti resolusyon tapnu maaprubaran iti pannakaipatakder ti franchise ti Small Town Lottery kadagiti sumagmamano a lugar ditoy pagilian.
Kinunana, imbes a sumrek kuma iti ahensya dagiti mapastrek dagiti naduma-duma a STL franchise, agderetso iti kwarta kadagiti korap a board member ta awan met iti resibo a maited kadakuada.
Nu pay kasta, saan nga anamongan iti agpanpanday linteg iti pannakaipasardeng ti STL operations ta ginasut a ribo a tattao iti maapektaran, nangruna dagiti agindeg kadagiti probinsiya.
