VIGAN CITY – Saan nga ibilang ni Commission on Election (Comelec) spokesman James Jimenez a panangsabotahe iti manarimaan nga overseas absentee voting dagiti sumagmamano a naireport kadakuada a babassit a parikot, kas iti mapukpukaw a nagan dagiti botante ken makina a saan a nausar.
Idiay Hong Kong, idi nangrugi ti OAV idiay ket adda iti dua a makina a saan a nausar ta saan a nakapasa iti diagnostic test ngem nasukatan met laeng.
Ti eksklusibo a pannaki-uman ti Bombo Radyo Vigan ken ni Jimenez, naibaga na a dagiti maaw-awat da a verified report ket babassit laeng a parikot nga insigida met a nasolusyonan.
Immunan a kinumpirmaran ti opisyal a manipud idi nangrugi idi Sabado agingga iti agdama ket addan dagiti dua a namonitor da a fake news kagiddan iti panangrugi ti OAV, isu iti damag nga addan dagiti kandidato a mangab-abaken uray nu saan pay a nangrugi iti panagbilang iti botos ken ti damag a dagiti dua a makina a saan a nausar ket pagilasinan iti panagswitik iti eleksyon a nainget met a pinaglibakan ti poll body.
