Imbutaktak ni Public Attorney’s Office chief Atty. Percida Rueda-Acosta a sumagmamano kadagiti abogadoda iti nakapasar ti depresyon ken anxiety gapu iti kaadu a kaso nga igiggamanda.
Iti panagtratar ti budget iti Senado, kinuna ni Acosta a 317 a kaso iti iggem ti maysa nga abogado iti uneg iti makatawen.
Inlawlawag ni Acosta nga adda gundaway ti maysa a calendar, adda tallopulo wenno uppat a pulo a kaso iti aggi-giddan a nakaituding iti panagdenggeg a saan a mabalin a maitantan isu nga agov-overtime dagiti abogado uray Sabado ken Domingo.
Saan pay a mabalin nga agkedked dagiti abogado ta posibleda a sumango iti administrative case.
Kagiddan dayta ket impanakkel ni Acosta a nakairekord iti PAO iti 85.04% success rate para iti first semester iti 2025 a nangatngato kumparar iti 83.63% a nairekord idi 2024.
Idi 2024 ket nasurok 847,000 a kaso iti iniggaman ti PAO, ngem iti kagudua iti tawen pay laeng iti 2025 ket umaboten iti 667,000 a kaso iti nairekord.
