Im-imbestigaran ti Anti-Money Laundering Council (AMLC) ti sumagmamano a nagan dagiti kontraktor a mapapati a nairaman kadagiti irregular flood control project.
Segun ken ni Bangko Sentral ng Pilipinas (BSP) Governor ken AMLC Chairman Eli Remolona, umaw-awat ti AMLC kadagiti mapagduaduaan a transaction report manipud kadagiti bangko, ken no adda agparang a nagan, dagus nga imbestigaranda.
Nagballaag ti maysa nga agpanpanday-linteg iti Kamara a paayabanna dagiti opisial, kontraktor, ken agpanpanday-linteg no mapaneknekan a nairamanda kadagiti anomalous flood control project wenno dadduma pay a proyekto iti imprastruktura.
Imbilin met ti Commission on Audit (COA) ti in-person technical inspection kadagiti amin a flood control project idiay Bulacan.
Inrusat ti sumagmamano nga ahensia ti gobierno a pakairamanan ti Department of Budget and Management (DBM), ken Department of Information and Communications Technology (DICT) ti online portal a pakamonitoran ti publiko no kasano ti nagdur-asan ken mano ti naipondo kadagiti flood control project iti pagilian, kas paset iti reporma.
