VIGAN CITY – Anamongan ti maysa a student leader iti Ilocos Sur National High School a ni Alliah Nicole Sayo nga inton October 5 pay laeng ti panaglukat ti klase nga immunan a napagtutulagan idi kallabes nga August 24.
Iti pannaki-uman ti Bombo Radyo Vigan ken ni Sayo, patienna a ti nasao nga addang ket maikkan ti naan-anay a panawen dagiti mangisursuro, nagannak ken dagiti estudiante nga agsagana.
Kabayatanna, dakkel a tulong kadakuada ti maisaysayangkat a webinar ta nalawlawaganda no ania dagiti rumbeng a maadalda uray no adda pay laeng ti COVID19 pandemic a manglaplapped kadakuada a makasubli iti face to face learning.
Nupay kasta, natalekda a babaen iti panagtitinnulong dagiti opisial ti tunggal barangay, dagiti nagannak ken kadakuada nga agad-adal ket naballigi ti maipatungpal ti blended learning.
