Maysa nga street level individual ti nakemmeg iti naiwayat a search warrant operation iti ili ti Magsingal, Ilocos Sur.
Ti suspek ket agtawen iti uppat a pulo ket lima, agnaed iti nasao nga ili.
Iti pannaki-uman ti Bombo Radyo Vigan ken ni PLT. William Costales, Deputy Chief of Police iti Magsingal Police Station, nabalud idi 2016 ti suspek gapu met laeng iti iligal a droga ngem nakaruar idi 2021 ket sinublianna manen ti iligal nga aramidna isu a sinipsiputan met daytoy dagiti pannakabagi ti linteg.
Naala ti 6.17 grams ti mapapati a shabu nga aggatad iti P41,956 a naikabil iti walo a piraso ti heat sealed transparent plastic sachet pakairamanan dagiti nadumaduma a drug paraphernalia.
Malaksid dayta, naala pay ti maysa a handgrip para iti caliber 38, maysa a unit ti caliber 38 revolver, handgrip ti caliber 38, holster, bala para iti caliber 38, ken caliber 38 cylinder.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002 ken Republic Act 10591 wenno Comprehensive Firearms and Ammunition Act.
