Maysa nga Street Level Individual ti nakemmeg iti naiwayat a buy-bust operation iti siudad ti Candon, Ilocos Sur.
Ti suspek ket agtawen iti duapulo ket dua, taga-Galimuyod ngem agnanaed iti siudad.
Iti pannaki-uman ti Bombo Radyo Vigan ken ni PLT. Jovelyn Antalan iti Candon City Police Station, ti suspek ket nakemmeg mane nidi March 2024 gapu met laeng iti iligal a droga isu a dimmalan iti probation ngem nagtultuloy met ti iligal nga aramidna.
Idi namonitor dagiti pannakabagi ti linteg nga agilaklako manen iti iligal a droga kadagiti kabangibang nga ili ket nangiwayatda iti operasyon a nakakemmegan ti suspek.
Naala kenkuana ti maysa gramo ti mapapati a shabu nga aggatad iti P6,800 a naikabil iti dua a piraso ti heat-sealed transparent plastic sachet a nagserbi kas buy-bust item ken ikotna.
Dagiti non-drug evidence ket pakairamanan ti lima a boodle money a 1,000 peso bill, cellphone, getting, dua a piraso ti awan nagyanna a plastic sachet, brown pouch, tulbek ti motorsiklo, driver’s license, motorsiklo ket personal money a P1,520.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
