Nakemmeg ti maysa nga Street Level Individual iti buy-bust operation idiay Sitio Balballucot, Salvador 2nd, Candon City, Ilocos Sur.
Immuna naipakaammo a napasamak ti operasyon iti boundary ti Banayoyo ken Candon City, Ilocos Sur.
Iti pannaki-uman ti Bombo Radyo Vigan ken ni Police Captain Medward Galay manipud iti Banayoyo Police Station, ti suspek nga agtawen iti uppat a pulo ket walo, mannalon ken agnaed iti siudad ti Candon ket datin nga adda kasona idiay La Trinidad, Benguet gapu met laeng iti iligal a droga.
Nabalud pay idi idiay Baguio, ket nabayag met a sinipsiputanda ti tignay ti suspek gapu iti panangsublina iti iligal nga aramidna.
Nakumpiskar kenkuana ti nasurok kumurang 0.25 grams ti mapapati a shabu nga aggatad iti P1,700 a naikabil iti dua a heat-sealed transparent plastic sachet.
Dagiti non-drug evidence ket pakairamanan ti maysa a genuine P500, maysa a piraso ti small white paper, cellphone, pakete ti sigarilyo a naglaon iti lima a cigarette stick, lighter, nadumaduma a tulbek ken personal a kuarta a P12,460.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
