Maysa nga street level individual ti nakemmeg iti buy-bust operation idiay Barangay Poblacion Norte, Sta. Maria, Ilocos Sur, maibilang a Drug Cleared Barangay.
Ti suspek ket agtawen iti uppat a pulo ket siam, tubo iti Poblacion, Sto. Domingo, ngem aggigyan idiay Barangay Poblacion Norte, Sta. Maria.
Naala kenkuana ti dua a gramo ti mapapati a shabu nga aggatad iti P13,000 a naikabil iti tallo a piraso ti heat-sealed transparent plastic, dua a gramo ti mapapati a marijuana nga aggatad iti P240.00 ken dua a piraso ti papel kasta payen ti tallo piraso a medium heat-sealed transparent plastic sachet a naglaon iti residue ti mapapati a shabu.
Dagiti met non drug-evidence a naala ket pakairamanan ti maysa a cellphone, jewelry box, uppat a lighter, maysa a yellow paper, pvc pipe, karton a naglaon iti narolyo nga aluminum foil, sigarilyo a naglaon iti crumpled aluminum foil, suwon butane gas cartridge with improvised burner, improvised needle, maysa a homemade caliber 22 pistol nga awan serial number na, maysa a piraso ti magazine para iti caliber 22 nga adda iti innem a balana, maysa nga armscor box a naglaon iti limapulo ket maysa a piraso ti caliber 22, sling bag ken cellphone.
