Nakemmeg ti maysa nga street level individual babaen iti naisayangkat a buy-bust operation idiay Barangay Poblacion, Galimuyod, Ilocos Sur, maibilbilang a Drug Cleared Barangay.
Ti suspek ket agtawen iti tallopulo ket uppat, mannalon, taga-Barangay Calongbuyan, Galimuyod.
Iti pannaki-uman ti Bombo Radyo Vigan ken ni PLT. Richard Pajo, ti suspek ket online seller a nabayagen a sinipsiputanda gapu iti iligal nga aramidna.
Nakumpiskar manipud iti suspek ti 1.44 grams ti shabu nga aggatad iti P9,792 a naikabil iti innem a piraso ti heat-sealed transparent plastic sachet.
Malaksid dayta, naala pay ti buy bust money ken dadduma pay a kuarta kasta payen dagiti nadumaduma a paraphernalia.
Sangwen ti suspek ti kaso a panaglabsing iti RA 9165 wenno Comprehensive Dangerous Drugs Act of 2002.
