Maysa nga street level individual ti nakemmeg iti buy-bust operation idiay Barangay Orence, Narvacan, Ilocos Sur.
Nabigbig ti suspek a ni Mario Rojas Nera, agtawen iti limapulo ket uppat, agnaed iti Barangay San Jose, iti nasao nga ili.
Iti pannaki-uman ti Bombo Radyo Vigan ken ni Police Staff Sergeant Allen Rosal manipud iti Narvacan Police Station, positibo ti nagresultaan ti inaramidda a test buy ta ti suspek ket sinublianna ti dati nga aramidna nga agilaklako iti iligal a droga.
Naala kenkuana ti 0.3 grams ti mapapati a shabu nga aggatad iti P2,040 a naikabil iti dua a transparent plastic sachet.
Dagiti non-drug-evidence met a naala ket ti maysa a sangaribo a pisos a buy-bust money, maysa a piraso ti bassit a papel, P5,120 a personal money, ken maysa a motorsiklo.
Sangwen ti suspek ti kaso a panaglabsing iti Republic Act 9165 wenno Comprehensive Dangerous Drugs Act of 2002.
