VIGAN CITY – Maysa ti Sto. Domingo Municipal Police Station kadagiti tallopulo ket dua a police station a pinadayawan ti Police Regional Office 1 gapu kadagiti natulonganda bayat iti pannakaipatungpal ti community quarantine ti probinsia.
Iti pannaki-uman ti Bombo Radyo Vigan ken ni Police Captain Christopher Ramat, nangirugida ti programa a naawagan ti Adopt a Family Program manipud idi Abril a pinagtitinnulongan dagiti kameng ti Sto. Domingo PNP.
Babaen iti programa, mangpilida ti benepisyaryo iti tunggal barangay ket maysa kadakuada ni Rogelio Tabangcura a taga-Nanerman a nadadael iti pagtaenganda ket pinagtitinnulonganda nga impaayan ti tulong ken impablaakda iti social media.
Nupay kasta, linawas a bisbisitaenda ni Tabangcura tapno ipasigurado a nasayaaten ti kasasaadna gapu iti tulong a naggapu kadagiti pannakabagi ti linteg ken dagiti sabali pay a naayat a timmulong.
