Pinasingkedan ni Department of Public Works and Highways (DPWH) Secretary Vince Dizon a mapondoanen a sibubukel ti konstruksyon ti Sto. Cristo Flyover idiay Pampanga tapno malpas inton sumaruno a tawen.
Nagsarita ni Dizon kalpasan iti panag-inspeksyon ti konstruksyon ti alternatibo a ruta a gagem a makissayan iti nakaru a trapiko iti McArthur Highway idiay Angeles City.
Segun ti DPWH, arigna tallo a tawen a maar-aramid ti maysa a kilometro a flyover a nangrugi idi 2023, a mabalin koma a malpas iti uneg iti maysa ket kagudua a tawen no saan a bassit iti pondo.
Kabayatanna, binistana pay iti puted a paset ti Ines-Atlu Bola Bypass Road a mangkonektar iti Sta. Ines Exit iti North Luzon Expressway (NLEX).
Segun ken ni Dizon, dakkel a bang-ar dayta tapno makissayan ti trapiko iti kangrunaan a kalsada idiay Mabalacat City ken makatulong iti gagem a pagbalinen nga industrial-commercial hub iti siudad.
