VIGAN CITY – Saan a pinagkinnaawatan a binuyugan iti pannakabartek iti rason nu apay a binagkong ni Modesto Foronda nga agtawen ti lima pulo ket walo, STL employee ken agnaed idiay Sitio Bagong Barrio, Barangay Poblacion Sur, Sta. Maria ti kalugaranna a ni Judy Velano nga agtawen ti tallo pulo ket innem ken maysa a tricycle driver idi alas otso dyes iti rabii ti September 14.
Agsipud iti dayta, naitaray idiay Ilocos Sur District Hospital- Narvacan ti biktima para iti pannakataming iti dunor iti boksit na gapu iti pannakabagkong na idinto a ti suspek ket kinemmeg dagiti nagresponde nga otoridad.
Segun ken ni Police Executive Master Sergeant Jerry Valdez, deputy chief of police ti Sta. Maria municipal police station, inawis ti suspek ti biktima idi limmabas a nakalugan iti tricycle na ket naginom da kadua da ti maysa pay a kalugaran da idi adda iti saan a nagkinnaawatan ti biktima ken ti suspek.
Idi timmakder ti suspek, rinakem na ti uppat a barbecue stick sa na inbagkong ken ti biktima.
