VIGAN CITY – Dunor iti lapayag ken ulo ti sinagrap ni Rodel Garcia Almazan, agtawen iti tallopulo ket lima, STL collector, agnaed iti Barangay Paduros, Burgos gapu ti panangpaltog ti saan pay nabigbig a suspek.
Alas syete y media iti October 14, kinuyog ni Ronald Almazan Vinacio, agtawen iti uppat a pulo ket tallo ti biktima ket kunana iti idi alas syete bainte iti agsapa, bayat ti panagturong nga agpa-amianan ti biktima babaen ti motorsiklona ket maysa a lalaki a nakamotorsiklo ken nakasuot iti camouflage lousy cap ken black jacket a mangsarsaruno kenkuana ti nangpaltog iti biktima manipud iti likudanna babaen ti saan pay nabigbig a klase ti paltog.
Gapu dayta, saan a nakontrol ti biktima ti manibela ti luganna ken naidarusdos iti kalsada.
Naipaagas iti ospital ti biktima para iti pannakatamingna idinto a masapsapul met ti suspek a naglibas kalpasan ti pammaltog.
