VIGAN CITY – Makikamkammayet ti ACT-OFW Partylist iti gobierno kangrunaan iti Office of the President ken iti kongreso tapno maikkan ti stimulus package ken nayun a pondo ti Overseas Workers Welfare Administration ken ti Department of Labor and Employment tapno matulongan dagiti mapagawid nga OFW.
Iti pannaki-uman ti Bombo Radyo Vigan ken ni Rep. John Bertiz, patta-pattaen ti International Labor Affairs Bureau nga umabot iti nasurok maysa a milyon nga OFW ti posible a maawanan ti trabaho agingga inton 2021 isu nga ikagumaanda a maikkan ti tulong.
Kabayatanna, sagsaganaanda payen ti panagsangpet dagiti uppat a pulo ket dua a ribo nga OFW inton June ken duagasut a ribo pay ti manamnama a mapaawidda agingga iti malpas ti agdama a tawen.
Pinasingkedan ti kongresista nga agtultuloy ti nainget a panangmonitor-da kadagiti mapaawid nga OFW kasta payen dagiti na-stranded ken makitintinnulongda iti OWWA ta no dadduma ket adda latta ti pagkuranganda a nangitunda iti panagreklamo dagiti local government unit gapu ta saan a naipaka-ammo kadakuada nga adda dagiti agawid a kailianda nga OFW.
