Agserbi a pammaneknek ti panangibaga ni Vice President Sara Duterte a saan a nakapadas iti dakkes a pannakatrato manipud ken ni Presidente Ferdinand Marcos Jr.
Sungbat dayta ti Malakanyang kalpasan nga imbaga ni Duterte a dagiti dillawna ket nakapokus laeng iti panangimando ti presidente ken saan nga iti personal a relasionda.
Gapu dayta, kwinestion ni Palace Press Officer Claire Castro no apay a nagbalin a personal ti sumagmamano kadagiti imbaga ti bise presidente kontra ken ni Presidente Marcos, agraman ti immuna a pangtana iti biag ti Presidente, First Lady Liza Araneta-Marcos, ken dati a House Speaker Martin Romualdez.
Kinontra ni Castro ti imbaga ni VP Sara nga awan ti maar-aramidan ti administrasion ken nagulo ti gobierno, ta segun kenkuana ket agtultuloy ti panangipatungpal ti gobierno kadagiti programa kas ti pabalay ken flood control.
