VIGAN CITY- Nakaragsakan ni ACT Teachers Partylist Rep. France Castro ti kiddaw ni House Speaker Gloria Macapagal Arroyo a mapadaras ti imbestigasayon iti kaso a sangsanguen na, kadwa na ni dati a Bayan Muna Rep. Satur Ocampo ken dagiti dadduma pay nga indibidwal gapu iti mapapati a panagdukot, human traficking ken child abuse.
Ti exclusive interview ti Bombo Radyo Vigan kenni Representative Castro, kinuna na a babaen iti kiddaw ni Arroyo ket nadardaras a maiserbi ti hustisya ken maibutaktak ti pudno a napasamak tapno mapaneknekanen nga awan ti inaramid da a panaglabsing iti linteg.
Inaklon na a ngimmato ti morale da iti panangikalintegan kadakuada ni Arroyo nangruna idi inbaga na a karbengan da ti marespetar ken matrato nga adda ti dignidad na iti laksid a sumangsango da iti kaso.
Kabayatanna, isagsaganan da Castro ti affidavit da inaig iti kaso a naipila kadakuada ket nakasagana da a sanguen iti anya man a desisyon ti prosecutor.
Inpaganetget ti agpanpanday linteg nga awan ti dakes a gandat da kenni Ocampo iti panagturong da idiay Salugpongan School no di ket maysa a humanitarian action ta nagipatulod da ti taraon gapu iti maatap a supply blockade iti nasao a lugar.
Innayonna a nagturong da idiay talaingod idi rabii ti Mierkules ta nakaawat da ti impormasyon ti mapapati a harassment nga ar-aramiden dagiti suldado isu a napursaran dagiti mangisursuro ken lumad students iti tengga ti rabii ket dayta ti rason isu a nagresponde da agingga a nakemmeg ida dagiti otoridad.
Patien ti agpanpanday linteg nga inbilin wenno ammo ni Presidente Rodrigo Duterte iti pannakakemmeg na kas maibasar kadagiti statements na kontra iti komunista a grupo ken kadagiti supporters ti New People’s Army.
