VIGAN CITY – Siam ti natay idinto a limapulo ket uppat ti nadundunor kalpasan a narpuog ti stage iti campaign rally ti maysa a presidential candidate idiay Mexico gapo iti napigsa nga angin.
Segun kenni Governor Samuel Garcia ti Nuevo Leon state, Mexico, karaman kadagiti natay ket maysa a menor de edad , adda dagiti naidalan ti operasyon idinto a dagiti dadduma a nadangran ket addan iti natalged a kasasaad.
Inpakaammo ni presidential candidate Jorge Alvarez Maynez a saan isuna a naan-ano ngem mangiyuswatda ti imbestigasyon iti napasamak.
Sakbay ti insidente ket immuna nga inpakaammo ti meteorological service ti Mexico a makapasar ti intero a rehion ti napigsa nga angin nga adda kapigsana a 70 kilometers per hour sipud pay idi aldaw idi Miyerkules.
