Mangipatungpal iti security and deployment plan ti Sta. Maria Municipal Police Station tapno masigurado ti seguridad dagiti dumar-ay kadagiti aktibidad kagiddan ti kapiestaan ti nasao nga ili inton bigat, Agosto 15, 2026.
Iti pannaki-uman ti Bombo Radyo Vigan ken ni PLT. Jenson Refuerzo, naituding ti 100-percent full-duty deployment dagiti pulis, partikular kadagiti kangrunaan a kalsada, Minor Basilica of Our Lady of the Assumption, plaza, ken dadduma pay a lugar iti aglawlaw ti ili.
Mai-augment met ti nasurok-kumurang 80 personnel manipud iti Ilocos Sur Police Provincial Office tapno tumulong iti panangpatalinaed iti seguridad ken kappia, nangruna kadagiti manamnama a dumar-ay a deboto ken bisita.
Addanto maangay a misa iti alas-4, alas-6, alas-8 ken alas-10 iti bigat, idinto nga alas-3 ken alas-5 iti malem.
Gagem ti deployment a masigurado ti kinatalged dagiti deboto, bisita, ken dadduma pay a makipaset iti parambak.
Inton bigat ket isu ti pannakarambak ti yuuli ni Birhen Maria sadi langit.
