Manarimaan ti pannakikinnammayet ti Sta. Cruz Municipal Police Station kadagiti tallo a lugar a naibaga ti maysa a babai a nagtakaw iti supermarket idiay Poblacion Este, Sta. Cruz, Ilocos Sur.
Iti pannaki-uman ti Bombo Radyo Vigan ken ni Police Major Paul Vincent Tadeo manipud Sta. Cruz Municipal Police Station, agduduma ti naibaga ti suspek nga address-na ta iti damo ket Antipolo City, maikadua ken Caloocan ken maudi ket Malabon.
Dagitoy ita a lugar ti pagsalsaludsodan dagiti pannakabagi ti linteg no datin nga adda record-na ti suspek.
Maipalagip a naimatangan ti security guard ti suspek a pimmanaw iti establisimiento a nakaiggem iti black bag ket makapaatap ti tignayna isu nga incheck na ket naduktalan ti panagtakaw ti suspek kadagiti nadumaduma a banag manipud iti grocery store, agsipud ta awan pay naipakitana a resibo.
Inted ti suspek ti bag iti security guard ken timmaray a napan iti exit isu a kinamatna.
Ti bag ket naglaon iti duapulo a piraso iti assorted light items nga aggatad iti P10,459 agraman dagiti insukibotna iti badona a sangapulo a piraso iti Body Spray nga awan ti resibona nga aggatad met ti P1,197.50.
