Pakaidayawan ti ili a Sta. Catalina nga isuda ti umuna kadagiti amin nga ili ti probinsia a naimuntaran iti early warning system w/ public address.
Iti pannaki-uman ti Bombo Radyo Vigan ken ni Municipal Disaster Risk Reduction and Management Officer Janette Rabara, ti pannakimuntar ti nasao a multi-hazard warning system ket inisyatiba ti MDRRM ken ti Sta. Catalina Local Government Unit.
Arapaap daytoy a nabayag ti ili ta patienda a dakkel ti maitulongna no adda didigra nangruna kadagiti vulnerable area iti nasao nga ili kas kadagiti adda iti igid ti kabaybayan.
Iti agdama, maysa nga station pay laeng ti nakaimuntaranna ngem planodanto a nayunan tapno mapakamoan dagiti agindeg no adda bagyo, gingined ken dadduma a didigra ket makapagbakwitda nga insigida.
Maikidkiddaw met kadagiti agindeg nga amuenda dagiti uni ti device tapno masakbayanda ti didigra.
