VIGAN CITY – Agsagsaganan dagiti kameng ti Sta. Catalina Municipal Station para ti Rhythm Festival a maisayangkat idiay Sta. Catalina beach tatta nga aldaw kas paset iti Kannawidan Ylocos Festival 2020.
Ti pannaki-uman ti Bombo Radyo Vigan ken ni Police Captain Richard Cario, addan dagiti addang a napagtutulaganda tapno mapagtalinaed ti linak ken talna kabayatan iti nasao nga aktibidad ken kunana a makanay iti puwersa da nga agbantay iti lugar tapno maliklikan iti aniaman a dakes a pasamak.
Nadakamat ni Cario a kaduada ti Municipal Disaster Risk Reduction and Management Council ken Rural Health Unit nga agbantay tapno adda nakasagana latta nga agresponde nu adda dagiti saan a mapakpakadaan a pasamak.
Kidkiddawen na iti pannakitinnulong dagiti tanod kasta pay nga inbalakad na kadagiti mapan agbuya a saanda nga aginom iti arak ken sumurotda kadagiti pagannurutan tapno naur-urnos met laeng ti nasao nga aktibidad.
