Idurduron ti Social Security System (SSS) ti Contribution Subsidy Program (CSP) tapno matulongan dagiti low-income earners imbes nga itantan ti panagngato ti kontribusion dagiti miembro.
Inlawlawag ti presidente ti SSS a ni Robert Joseph de Claro a ti panangitantan iti panagngato ket apektaranna ti kapasidad ti ahensia a mangipaay iti tulong, nangruna no adda dagiti kalamidad.
Panggep ti Contribution Subsidy Program ti agkiddaw iti pondo manipud kadagiti nabaknang nga indibidual tapno matulongan dagiti low-income earners kadagiti kontribusionda.
Innallukoy ni De Claro dagiti nabaknang nga indibidual a makitinnulong iti SSS iti panangsuporta iti nasao a programa.
Kabayatanna, indepensa ti Malacañang ti panagngato ti premium ti SSS, a nangibaga a daytoy ket “naadal a nasayaat” ken mangited iti expanded benefits.
Impaganetget ni Executive Secretary Lucas Bersamin a rumbeng a mapalubosan ti SSS a mangaramid iti mandatona nga awan ti makibibiang.
Kinuestionaran pay ni Bersamin ti timing dagiti panawagan a mangsuspenso iti panagngato, kangrunaan ken ni dati a presidente ti SSS a ni Rolando Macasaet, a kandidato itan para iti SSS-GSIS Pensioner Party-list.
