VIGAN CITY – Pinasingkedan ni Senior Trade and Industry Specialist Annabelle Polanco ti DTI-Ilocos Sur a manarimaan iti panagmonitorda kadagiti pagtagilakoan tapno masigurado a masursurot iti Suggested Retail Price ti face shield.
Iti pannaki-uman ti Bombo Radyo Vigan ken ni Polanco, nakunana a ti rumbeng a suruten a presyo iti face shield nga inyetnag ti Department of Health ket ti P26-P50.
Segun ken ni Polanco, rumbeng pay a ti gatangen dagiti consumer a face shield ket naaramid iti plastic, saan a blur, free-from-fog, umanay ti ulo, nakumportable no maaramat ken maakaluban iti sibubukel a rupa tapno maliklikan iti virus.
Innayonna pay nga araramidenda amin a kabaelanda kaduada ti Department of Health tapno masalwadan dagiti consumer kontra kadagiti agilaklako iti saan a dekalidad a face shield.
