Nangiruar ti Philippine Postal Corporation (PHLPost) ti maysa nga special commemorative stamp kas pammigbig ken panangrambak daydi Pope Francis gapu ti patawidna a pammati, pannakipagrikna ken panagserbi iti sangalubongan.
Segun ken ni PHLPost Postmaster General ken Chief Executive Officer Luis Carlos, ti inisyatiba ket maysa a napakumbaba a wagas ti korporasyon tapno bigbigen ti maysa a world religious figure a nakaimpluwensya kadagiti umili pakairamanan dagiti minilion a Pilipino.
Naipakita ti selyo babaen ti maysa a se-tenant format a buklen ti connected pairs dagiti disenyo a ti tunggal maysa ket maipanggep iti biang ti relihiyon ken global humanitarian work.
Segun ti PHLPost, ti umuna nga aspeto ket mangipakita ti spiritual a panagpakumbaba ti Santo Papa idinto a ti maysa ket mangipasimudaag iti kinatibker ti adbokasiyana para iti kinakappia, social justice ken panangtaripato iti aglawlaw.
Pakabuklan a 20,000 a kopya ti commemorative stamp iti naimprenta ken nakaituding a mairelease kas paset iti panagrambak.
