VIGAN CITY – Kiniddaw ni Clifford Inez, bise mayor iti ili ti Sinait a malukatan iti special audit tapno makita a naimbag no ania iti nakaibanaganna ti dakkel a gatad ti pondo iti ilida.
Dayta ket kalpasan iti mapapati a saan nga usto a pannakaaramat ti pondo a pangtulong kadagiti umili a naapektaran iti community quarantine.
Segun ken ni Inez, awan iti parikut no immuna a nagastos iti walo a milyon a pisos a pondo iti Bayanahihan to Heal as One ngem para kenkuana, rumbeng koma a sinurotda iti usto a pammalakad iti pondo a kas isu met iti napagtutulaganda idi kallabes ta no naibus iti 6.3 a milyon a pisos a calamity fund ket mabalinda nga isaruno iti walo a milyon a pisos.
Ingunamgunam ti bise mayor a saanna kayat a malokloko pondo ti pagpapatangan ta dayta ket para iti pagsayaatan dagiti umili ken inyunay-unayna nga ar-aramidenna laeng dagiti pagrebbenganna nga agserbi iti nasao nga ili.
