Nagpanawagan da House Speaker Ferdinand Martin Romualdez ken dagiti sumagmamano a senador a pagbalinen a simple ti panaglukat ti 20th Congress ken State of the Nation Address ni Presidente Ferdinand Marcos Jr kas pannakipagrikna iti minilion a Pilipino a naapektaran iti bagyo ken layus.
Segun ken ni Romualdez, saan a mayannatup ti panangisayangkat iti nagarbo a seremonya idinto nga adu a pamilia ti marigatan a bumangon gapu iti iduduprak ti bagyo Crising, Dante, ken Emong.
Kagiddan dayta, kiniddaw da Senador Loren Legarda ken ni Senador JV Ejercito nga yannatup ti SONA iti agdama a sasaaden ti pagilian.
Nakairuaman dagiti senador ken kongresista a magna iti red carpet a nakakawes iti formal gowns ken barong sakbay ti panagsarita ti presidente, ngem ita a tawen ket posible a maikkat ti red carpet kas pannakikaysa kadagiti nadidigra.
