Saanen a kasapulan nga agbayad iti Philhealth premium contribution dagiti kwalipikado a solo parent ta baklayenen daytoy ti national government.
Segun ken ni Jay Oliver Omoso, Social Insurance Officer ti Philhealth-San Ildefonso, kasapulan laeng nga aktibo a miembro ti solo parent ken mangipakita iti Member Registration Form ken valid a Solo Parent ID tapno ma-update ti rekordda ken ma-avail ti benepisio.
Mabalbalakadan dagiti solo parent nga i-renew ti Solo Parent ID sakbay nga ag-expire tapno agtalinaed nga updated ti status-da ken maaramatda ti benepisio a bakbaklayen ti national government.
Iti salinong ti programa, saanen a maikissay iti pastrek ti kwalipikado a solo parent ti Philhealth premium contribution, a makatulong tapno saanda unay a madagsenan iti pinansial.
Sakup met ti Philhealth coverage dagiti kwalipikado a solo parent ken dependent-da, kas mayataday kadagiti patakaran ti ahensia.
