Nakapokus ti prosecution team iti panangipresentar ti solid a kaso kontra ken ni Vice President Sara Duterte ken saan a ti botos a kasapulan tapno ma-convict daytoy iti uppat nga Articles of Impeachment.
Daytoy ti pinasingkedan ni prosecutor ken Akbayan party-list Rep. Chel Diokno mainaig ti patangan ti threshold kalpasan a simmango iti impeachment court da dati a Sumpreme Court (SC) Justices Artemio Panganiban ken Renato Puno ken dati a SC Associate Justice Adolfo Azcuna, idinto a nangted ti written opinion ni dati a Chief Justice Hilario Davide Jr.
Impaganetget ni Diokno a bilib isuna kadagiti tallo a dati a chief justice iti posision da mainaig iti patangan ti threshold gapu ta inadal da dagiti nadakamat nga isyu.
Maipalagip nga uppat nga Amici Curiae wenno friends of the court ti inimbitaran ti Impeachment court, agpapada a pabor dagituy nga ibasar ti threshold no mano dagiti senador ti aktuwal a dimmar-ay iti impeachment trial ken saan a ti kabuklan a bilang dagiti senador.
