Sumagmamano a tonelada ti smuggled a nateng manipud China ti nagpositibo iti lead ken E.coli contamination.
Dagiti nateng a nakumpiskar iti maysa a bodega idiay Navotas City idi Agosto ket awan ti sanitary ken phytosanitary import clearance na.
Segun kenni Bureau of Plant Industry Plant Product Safety Division chief William Mugot, saan a dimmalan ti usto a proseso dagiti nasao a produkto isu a saanda ammo no kasano na-produce ken no ania ti usto a naggapuanna.
Maibasar kadagiti naisayangkat a test kadagiti produkto, nagpositibo dagitoy a kontaminado ti pesticides ken heavy metals a delikado ti salun-at no makonsumo.
Natakuatan a dagiti carrot ket addaan iti maximum limit ti lead, bayat a dagiti dadduma a nateng a kas iti kamatis ken sibuyas ket natakuatan nga addaan iti nangato nga E.coli, a mangipasimudaag iti posible a kontaminasion manipud iti ibleng ti tao wenno ayup.
Gapu dayta, nagpalagip ti Bureau of Plant Industry kadagiti consumers a bugwan a nasayaat dagiti nateng sakbay nga iluto tapno maikkat dagiti traces ti pesticides ken heavy metals.
