Saan a ninamnama ti maysa a graduate ti Saint Louis University a ni Kassandra Maureen Castillo Ignacio nga abalin a rank 9 iti Nursing Licensure Examination.
Iti pannaki-uman ti Bombo Radyo Vigan ken ni Ignacio, awan parikut kenkuana no saan nga agbalin a topnotcher ta ti kalkalikagumanna laeng ket ti makapasa, uray pay no makarikrikna iti pressure ta nagturpos a Magna Cum Laude.
Patienna a ti panagbalinna a topnotcher ket gapu ta impasnekna met ti kabaelanna a nangsungbat iti exam ken ti panangikarkararagna.
Nursing ti kurso nga innalana gapu ta makitkitana iti parikut iti health sector ti pagilian ken adu dagiti saan a maka-access iti dekalidad a pannakaaywan.
Ket kas maysa a registered nurse itan, natalek a kabaelanna ti makaaramid iti panagbalbaliw para iti lubong kangrunaan iti sektor iti salun-at.
Inspirasyon ni Ignacio ti pamilia, Dios ken dagiti gayyemna iti pannakaipasana ti exam.
