VIGAN CITY – Inlawlawag ni Jiggs Lardizabal iti Region 1 Civil Service Commission a saan a limitado ti slot para iti aplikasyon iti Civil Service Examination a mapasamak inton March 26, 2023.
Dayta ket gapu ti saanda a ninamnama a kinaadu dagiti aplikante a nasapa a napan iti field office sipud idi December 22 gapu ti panangipagarupda nga amangan ta maawananda ti slot.
Iti pannaki-uman ti Bombo Radyo Vigan ken ni Lardizabal, awanen ti online reservation ta naipatungpal laeng ti nasao a sistema gapu ti panangsurotda iti implentasyon nga inyetnag ti Ilocos Sur provincial government ken Vigan City government iti baet ti pandemya ngem iti agdama ket silulukaten para iti publiko ken saanen a malimitaran ti bilang dagiti ageksam isu nga uray no kasano kaadu dagiti aplikante ket maakomodarda latta.
Ti aplikasyon para iti Professional ken Sub-professional level ket agingga pay inton January 25 isu a kiniddawna kadagiti interesado nga agapply ta saanda a makigidgiddan iti kinaadu dagiti mapmapan kadagitoy a tiempo ta saanda met a maawanan iti slot.
Pinalagipan met ni Lardizabal dagiti interesado nga aplikante a kumpletwenda dagiti requirements kas ti application form; uppat a piraso ti passport size photo; original ken photocopy ti valid ID nga adda nakailanad a date of birth; consent form; ken PHP500 nga application fee.
Kabayatanna, kiniddawv pay ti nasao nga opisial a no adda dagiti pakakumikumanda ket nawayada nga agsaludsod kadagiti staff ti opisina ken pinalagipanna a saanda nga agapura ta maikkan amin iti gundaway.
