VIGAN CITY – Awan ti parikut iti sitwasyon dagiti Persons Deprived of Liberty iti baet ti kinabara ti panawen kadagiti jail facility iti siudad ti Vigan ken iti ili ti Bantay.
Iti pannaki-uman ti Bombo Radyo Vigan ken ni Senior Jail Officer III Ronald Rapanut, Assistant Warden iti Vigan City Jail, saan pay laeng a congested ti pasilidadda ken kanayon ti panangmonitor dagiti personnel iti kasasaad dagiti PDL.
Malaksid dayta, mayadal pay kadagiti PDL no kasano a liklikan dagiti sakit a patauden ti nabara a panawen kas ti heat stroke.
Adda met ti industrial fan nga indonar ti Ilocos Sur Provincial Government nga us-usarenda ken awan ti parikut no maipanggep iti suplay ti danum.
Kabayatanna, saan pay laeng a naabot t 82 a maximum capacity ti jail facility iti ili ti Bantay ta adda 47 laeng dagiti PDL isu a nalawa pay laeng.
Impannakkel met ni Senior Jail Officer IV Bayani Gaspar nga awan iti uray maysa kadagiti PDL ti nagsagaba iti heat-related illness.
Kunana a napaniir dagiti kuartoda ken saanda a maaw-awanan iti danum.
