VIGAN CITY – Nairiing manen idiay Kamara iti singasing a Charter Change wennu iti pannakasukat iti pamunganayan linteg.
Idi naaprubaranen ti 2020 proposed national budget, nangisayangkat ti executive session ti House committee on constitutional amendments tapnu maaprubaran ti uppat a singasing para iti panangbaliw ti pamunganayen linteg.
Segun ken ni Committee chairman Rufus Rodriguez, karaman kadagiti kayat da a mainayon a karbengan ti Kongreso ket iti mangputar ti linteg a mangiparit wennu mangkissay iti panagnegosyo dagiti gangannaet ditoy pagilian.
Malaksid iti dayta, kayat pay ti Kongreso a maysa laengen a partido iti paggapuan ti agtugaw a presidente ken bise presidente.
Innayon pay ni Rodriguez nga adda pay ti singasing a mabingay ti siyam a rehiyon iti pagilian ket tallo iti kada rehiyon iti maipatugaw idiay Kongreso isu’t gapu na nga agbalin ton a dua pulo ket pito dagiti senador manipud iti agdama a bilang da a dua pulo ket uppat.
Kayat pay dagiti agpanpanday linteg a pagbalinen a lima a tawen iti termino dagiti senador, kongresista ken dagiti local nga opisyal.
Inpatangken ti kongresista a suportado ti liderato ti Kamara iti maisingsingasing a mabaliwan iti agdama a pamunganayan linteg iti pagilian ken ad-adda manen a suportaran iti liderato ti Senado.
