Saan pay laeng a nakadesisyon ti Senado no ni Senador Chiz Escudero ti agbalin a presiding officer ti Senate Impeachment Court a mang-trial ken ni Vice President Sara Duterte.
Dayta ket kalpasan a pinasingedan ni Sen. Panfilo Lacson a ni Escudero ti inkeddengda nga agbalin a presiding officer iti impeachment, no man pay posible nga agbaliw pay dayta.
Segun ken ni Senate Pres. Win Gatchalian, pagpatanganda pay iti maisayangkat a caucus wenno taripnong dagiti senador sakbay a mangrugi ti impeachment trial a nakaituding inton July 6.
Nasaludsod met ni Gatchalian no kayatna a ni Escudero ti agbalin a presiding officer ti impeachment trial ket insungbatna a saanna nga unaan ti agbalin a resulta iti patangan.
Kinunana nga agbasar latta isuna ti rules iti panag-preside iti impeachment trial ta isuna ti Senate president.
