VIGAN CITY – Immapelan ti Samahang Industriya ng Agrikultura ken ni Presidente Rodrigo Duterte tapno matignayanen dagiti parikut a sangsangwen iti sektor ti agrikultura a nakaapektaran dagiti mannalon ti pagilian.
Iti pannaki-uman ti Bombo Radyo Vigan ken ni SINAG Chairman Rosendo So, nabayagdan nga inyuman iti Agriculture Department ti parikut ti sektor kas ti nalaka a presyo ti irik, nataktak a pannakaited ti kuarta dagiti mannalon iti salinong ti Bayanihan to Heal as One Act ken ti nailatangan iti dua a bilion a pisos a first border examination facility a manginspeksion kadagiti agri-product a maiserserrek iti pagilian.
Gapu ta awan pay laeng ti pagdurdur-asanna agingga ita ket napanunotdan a kiddawen ti tulong ti presidente tapno isuna a mismo ti mangbilin ken ni Agriculture Secretary William Dar a mangtignay.
Malaksid ti dayta, kayat ti grupo a direkta a kuartan ti ipaayda a tulong kadagiti mannalon nga aggapu iti nabatbati a pondo ti ahensia imbes a dagiti nadumaduma nga alikamen ken ganagan.
