Nagpanawagan ti Catholic Church kadagiti agpammati a temporaryo nga ag-disconnect wenno liklikan pay laeng ti kabaroanan a teknolohia ita a panawen ti Kwaresma wenno kagiddan ti Ash Wednesday a panagrugi iti 40-day Lenten Season.
Segun ken ni Rev. Fr. Rico John Bilangel a rector iti National Shrine of Our Mother of Perpetual Help, ita a gundaway ti panagpampanunot, panagbabawi, ken panagsubli manen iti Dios babaen iti panagkararag, panagayuno ken panangted iti limos.
Allukoyenna dagiti deboto nga agbalin a napudno kadagiti ar-aramidenda ken liklikan pay laeng iti ag-post kadagiti social media.
Kinunana nga agbibiag dagiti umili iti maysa a performative age ta agbalbalinen a content iti kinasayaat, branding ti charity ken pabuya iti panagkararag.
Impalagipna kadagiti agpammati nga impapusoan iti pudno a kaipapanan ti Kwaresma ken tutokan ti personal a langen-langen iti Dios ngem iti ipakita laeng iti online platforms.
