VIGAN CITY – Nakasaganan ti Quiapo Church para iti umadanin a Feast of the Black Nazarene inton January 9 ta nayulogen ti amin a pagannurotan, schedule, ken church announcements nga agserbi a tarabay para kadagiti dumar-ay a deboto.
Iti pannaki-uman ti Bombo Radyo Vigna ken ni Fr. Earl Allyson Valdez, attached priest iti Quiapo Church ken Spokesperson for the Feast of Black Nazarene 2023, kalpasan dagiti tiempo a naisanud ti piesta ni Apo Nazareno ket napagdesisyonan ti simbaan ti Quiapo ken dagiti stakeholders nga isubli ti parambak ngem adda laeng dagiti sumagmamano a mabaliwan kadagiti nakairuaman tunggal madanun ti petsa ti pannakarambakna.
Dayta ket pakairamanan ti panangipagel iti panag-agep ta inaramidda laengen a “Papugay” a daytoy ket agpila dagiti deboto iti igid ti simbaan nga isunto ti gundawayda a makaasideg, makaiggem, ken makapunas iti rebulto ni Apo Nazareno.
Awanen ti tradisyonal a libut wenno ti maaw-awagan a “Traslacion” ngem adda ti “Walk of Faith” inton January 8 a bisperas iti selebrasyon ket addanto misa iti tengnga’t rabii ti nasao nga aldaw sakbay a mailibut ti bassit nga imahe ni Nazareno manipud idiay Quirino a maipan idiay Quiapo.
Naibalakad met kadagiti mapan a deboto nga agitugotda iti kapoteda ken maal-allukoy dagiti senior citizen a saanen a makabael, masikug ken dagiti masakit a makipagpasetda laengen babaen iti livestreaming.
Malaksid dayta, maiparit ti panagitugot iti natatadem a bambanag ken masapul nga agisuot iti facemask ken suroten ti social distancing.
