Nagpanawagan ti Metropolitan Cathedral and Parish of the Conversion of St. Paul kadagiti agpammati a makikaysa iti pananglaban ti korapsion iti gobierno kagiddan ti naituding nga Anti-Corruption Rally inton bigat.
Iti pannakiu-uman ti Bombo Radyo Vigan ken ni Rev. Fr. Cosmenio Rosimo, allukoyenda dagiti umili a makimisa inton bigat, Setyembre 21 a nakasuot iti puraw a bado iti nasao a simbaan ken iti Simbaan a Bassit tapno impanawagan ti pannakadalus ti gobierno kas isimbolo ti maris puraw.
Innayon ni Rosimo a kasapulanen a maisardeng ti panagraira ti kurapsion ta no agtultuloy ket mabalin nga agrigat latta dagiti umili.
Bigbigen pay ti panagrigat dagiti umili nga agbayad iti buwis idinto a maibambanag laeng kadagiti korap nga opisial, imbes a para koma iti flood control projects a kangrunaan a kasapulan ti Pilipinas kas maysa a disaster-prone a pagilian.
Panawaganna nga ituloy latta a kararagan, ken makikaysa ti pannakaisardeng ti dakes a sistema ti gobierno a mangparparigat kadagiti umili ken madusa dagiti adda pakabasulanna.
